આધુનિક ઇન્ફ્રાસ્ટ્રક્ચરના પ્રતીક સમાન મુંબઇ અમદાવાદ બુલેટ ટ્રેન પ્રોજેક્ટ સાબરમતી રોલિંગ સ્ટોક ડેપોના વિકાસ સાથે સ્થિરતા અને કાર્યક્ષમતાના નવા યુગની શરૂઆત કરવા જઇ રહ્યો છે.
બુલેટ ટ્રેન પ્રોજેક્ટની ઓપરેશનલ જરૂરિયાતો સાથે એકીકૃત સંકલન સાધવા માટે રચાયેલા સાબરમતી રોલિંગ સ્ટોક ડેપોમાં અત્યાધુનિક સુવિધાઓનો સમાવેશ થાય છે, જેનો ઉદ્દેશ ટ્રેનસેટની હળવી અને ભારે એમ બંને પ્રકારની જાળવણીનો છે. ભવ્ય એવું 83 હેક્ટરમાં ફેલાયેલું આ ત્રણ ડેપોમાંનું સૌથી મોટું છે અને નિરીક્ષણ ખાડીઓ, વોશિંગ પ્લાન્ટ્સ, વર્કશોપ્સ, શેડ્સ અને સ્ટેબલિંગ લાઇનો સહિતના અત્યાધુનિક ઉપકરણોથી સજ્જ છે. સાબરમતી ડેપો જાપાનના ડેપોમાંથી પ્રેરણા લઈને બનાવેલું નવીનીકરણની દીવાદાંડી સમાન છે.
ડેપોમાં 4 (ચાર) પરીક્ષણ લાઇન અને 10 સ્ટેબલિંગ લાઇન છે, જેને ભવિષ્યમાં 8 (આઠ) પરીક્ષણ લાઇન અને 29 સ્ટેબલિંગ લાઇન સુધી વિસ્તૃત કરી શકાય તેવી યોજના છે. તદુપરાંત, વ્યાપક જાળવણી ક્ષમતા સુનિશ્ચિત કરવા માટે બોગીની અદલાબદલી માટેની લાઇન્સ અને જનરલ પરીક્ષણ લાઇન્સ જેવી વિશિષ્ટ સુવિધાઓનો સમાવેશ કરવામાં આવ્યો છે.
સાબરમતી રોલિંગ સ્ટોક ડેપોની મુખ્ય વિશેષતાઓ નીચે મુજબ છેઃ
- મુખ્યરેખા પર જમાવટ કરતા પહેલા શ્રેષ્ઠ કામગીરીની ખાતરી કરવા, ટ્રેનસેટ્સના સંપૂર્ણ તપાસ પછીના પરીક્ષણ માટે સમર્પિત ટેસ્ટ ટ્રેક
- અભૂતપૂર્વ ધોરણના ઔદ્યોગિક શેડ્સ, જાળવણી અને સંપૂર્ણ તપાસની પ્રવૃત્તિઓ માટે પૂરતી જગ્યા પ્રદાન કરે છે
- કાર્યક્ષમ ટ્રેનની રાહપલટાની કામગીરી અને એકંદર ડેપો વ્યવસ્થાપન માટે કેન્દ્રીયકૃત નિયંત્રણ સુવિધાઓ
- ડાઇનિંગ રૂમ અને કેન્ટીનથી માંડીને ઓડિટોરિયમ અને તાલીમ સુવિધાઓ સુધી, ડેપો કર્મચારીઓ અને અધિકારીઓ માટે સંપૂર્ણ વાતાવરણ પ્રદાન કરે છે
સાતત્યપૂર્ણ પદ્ધતિઓને અનુરૂપ સાબરમતી ડેપોમાં વરસાદી પાણીનો સંગ્રહ અને ગંદાપાણીના પુનઃ ઉપયોગ જેવી પર્યાવરણને અનુકૂળ પહેલનો સમાવેશ થાય છે. છાપરા ઉપર પડતાં વરસાદના પાણીની લણણી અને પાતાળ કૂવાનું પાણી ડેપોની પાણીની જરૂરિયાતોને પૂર્ણ કરશે, જ્યારે આધુનિક સુએજ અને એફ્લુઅન્ટ ટ્રીટમેન્ટ પ્લાન્ટ કચરાનું જવાબદારીપૂર્વકનું વ્યવસ્થાપન સુનિશ્ચિત કરશે.
તદુપરાંત, ડેપો ટ્રેનો પર અને ડેપો પરિસરમાં ઉત્પન્ન થતા કચરાના વિભાજન, સંકોચન અને યોગ્ય સંચાલન માટે સજ્જ છે, જે પર્યાવરણને બચાવવા માટેની તેની પ્રતિબદ્ધતાને રેખાંકિત કરે છે.
ડેપોના શેડ અને ઇમારતોની રચના એવી રીતે કરવામાં આવી રહી છે જેથી તેના પર ભવિષ્યમાં સોલર પેનલ્સ સ્થાપિત કરી શકાય. એકલા સાબરમતી ડેપોમાં લગભગ ૧૪ મેગાવોટ સૌર ઉર્જા ઉત્પાદનની સંભાવના હશે.
દૂરંદેશી અભિગમ સાથે સાબરમતી રોલિંગ સ્ટોક ડેપો એ માત્ર ટેકનોલોજીકલ કૌશલ્યનું ઉદાહરણ જ નથી, પરંતુ સાતત્યપૂર્ણ માળખાગત વિકાસ માટેની રૂપરેખા પણ છે. જેમ જેમ બાંધકામ આગળ વધતું જાય છે તેમ તેમ આ ડેપો મુંબઈ અમદાવાદ બુલેટ ટ્રેન પ્રોજેક્ટની સફળતામાં મહત્ત્વની ભૂમિકા ભજવે છે, જે કાર્યક્ષમતા, વિશ્વસનીયતા અને પર્યાવરણીય જવાબદારી માટેના નવા માપદંડો નક્કી કરે છે.
સાબરમતી રોલિંગ સ્ટોક ડેપો પર બાંધકામની અપડેટ
- ડેપો માટે ખોદાણકામ પૂર્ણ થઈ ગયું છે
- વહીવટી ભવન માટે ફાઉન્ડેશનના કામો અને આરસીસીના કામો ચાલુ છે
