केंद्रीय रेल्वेमंत्री श्री. अश्विनी वैष्णव यांनी आज अहमदाबादमधील साबरमती येथे मुंबई–अहमदाबाद उच्चगती रेल्वे (बुलेट ट्रेन) प्रकल्पाच्या महत्त्वाच्या बांधकाम स्थळांना भेट दिली. मंत्र्यांनी साबरमती उच्चगती रेल्वे (एचएसआर) स्थानक, एचएसआर मल्टीमोडल ट्रान्सपोर्ट हब आणि रोलिंग स्टॉक डेपो येथील सुरू असलेल्या कामांचा आढावा घेतला.
साबरमती एचएसआर स्थानक: मुंबई–अहमदाबाद बुलेट ट्रेन मार्गाचे टर्मिनल स्थानक असलेले हे स्थानक साबरमती आश्रमातील महात्मा गांधींच्या चरख्यापासून प्रेरित आहे. हे स्थानक अंदाजे 45,000 चौ.मी. क्षेत्रफळात उभारले जात आहे.
ट्रॅक फ्लोअरपर्यंतचे संरचनात्मक काम पूर्ण झाले असून, आतील सजावट आणि एमईपी कामे सुरू आहेत. या स्थानकात जागतिक दर्जाच्या प्रवासी सुविधांचा समावेश असेल—प्रतीक्षा कक्ष, विश्रांतीगृहे, बालक कक्ष, रिटेल आणि व्यापारी जागा—तसेच हे स्थानक विद्यमान रेल्वे, मेट्रो आणि बीआरटीएस नेटवर्कशी अखंडपणे जोडलेले असेल.
साबरमती एचएसआर मल्टीमोडल हब: हे आधुनिक सुविधांनी सुसज्ज असे केंद्र म्हणून डिझाइन करण्यात आले असून, एचएसआर स्थानक, साबरमती रेल्वे स्थानक, मेट्रो आणि बीआरटीएस यांच्यात सुलभ जोडणी सुनिश्चित करण्यासाठी उभारले जात आहे.
या इमारतीच्या समोरच्या भिंतीवर दांडी मार्चचा स्टेनलेस स्टील म्युरल आहे, जो साबरमतीच्या ऐतिहासिक वारशाला सन्मान देतो. या हबमध्ये कार्यालयीन जागा, हॉटेल सुविधा आणि प्रवाशांसाठी रिटेल दुकानं व रेस्टॉरंट्स यांसारख्या सुविधा आहेत. येथे सुमारे 1,200 वाहनांची पार्किंग सोय उपलब्ध आहे. हबमध्ये सौर पॅनेल्स, मनोहर छतबागा आणि ऊर्जा कार्यक्षम प्रणाली यांसह विस्तृत हरित पायाभूत सुविधा देखील आहेत.
साबरमती एचएसआर रोलिंग स्टॉक डेपो: हा प्रकल्पांतर्गत बांधण्यात येणाऱ्या तीन डिपोतून सर्वात मोठा आहे. हा हब 84 हेक्टर क्षेत्रफळावर पसरलेला आहे. या हबमध्ये ट्रेनसेट्सच्या लाइट आणि हेवी मेंटेनन्ससाठी तपासणी, स्थिरीकरण आणि कार्यशाळा लाईन्स यांचा समावेश असेल.
प्रशासन इमारत, तपासणी शेड्स आणि उपयुक्त साधने व ट्रॅकसाठीचे पायाभूत सुविधा यांचे बांधकाम वेगाने सुरू आहे. हा डिपो पर्यावरणीय शाश्वततेच्या नियमांचे पालन करेल. यामध्ये पावसाचे पाणी साठवणे, सौर ऊर्जा व्यवस्था आणि झिरो लिक्विड डिस्चार्ज उपचार प्रणाली यांचा समावेश असेल.
मुंबई–अहमदाबाद बुलेट ट्रेन प्रकल्पाची प्रगती: एकूण 508 किमीपैकी 325 किमी वायडक्ट आणि 400 किमी पियर कामे पूर्ण झाली आहेत. तसेच 17 नदी पूल, 5 पीएससी पूल आणि 10 स्टील पूल देखील पूर्ण झाले आहेत.
216 किमी ट्रॅक बेड लावण्यात आला आहे. ट्रॅक बेडच्या काठी 4 लाखाहून अधिक नॉईज बारियर्स बसवण्यात आले आहेत. गुजरातमधील सर्व स्थानकांवरील काम प्रगत टप्प्यात आहे. मुंबई अंतर्गत भूमिगत विभागावर जलद प्रगती होत आहे.
रेल्वेमंत्र्यांनी कामगिरीच्या गतीचे कौतुक केले आणि प्रकल्प वेळेत पूर्ण होण्याच्या मार्गावर असल्यावर भर दिला. त्यांनी नमूद केले की देशाचा पहिला बुलेट ट्रेन प्रकल्प पंतप्रधान श्री नरेंद्र मोदी यांच्या जागतिक दर्जाच्या पायाभूत सुविधांसाठीच्या दृष्टिकोनाचा आणि ‘2047 मध्ये विकसीत भारत’चा प्रत्यय आहे.
